ဇူလိုင် ၁၈ – ၂၀၂၅
SN (VOM)
မနက်ဖြန် ဇူလိုင် ၁၉ ရက်နေ့မှာ ကျရောက်မယ့် (၇၈) နှစ်မြောက် အာဇာနည်နေ့ အခမ်းအနား ကျင်းပနိုင်ဖို့အတွက် နစက က ရန်ကုန်မြို့မှာ လုံခြုံရေး တင်းကျပ်ထားတယ်လို့ မြို့နေ ပြည်သူတွေဆီက သိရပါတယ်။
လက်ရှိမှာ ဝန်ကြီးများရုံး ဘေးပတ်ပတ်လည်ကို ပိတ်ထားပြီး ဘန်ကာတွေဆောက်ကာ လုံခြုံရေး ယူထားတာတွေ ရှိသလို သိမ်ဖြူလမ်းနဲ့ မဟာဗန္ဓုလလမ်း၊ အနော်ရထာ လမ်းထောင့်တွေမှာလည်း ဘန်ကာတွေကို ပြန်ပြီးချထားတာ တွေ့ရတယ်လို့ ပြည်သူတယောက်က ပြောပါတယ်။
“ဝန်ကြီးများရုံး ဘေးပတ်ပတ်လည်ကို ပလက်ဖောင်းနားကနေစပြီး ဘန်ကာတွေချပြီး ပိတ်ထားတာ တပတ်လောက်ရှိပြီ။ ဝန်ကြီးများရုံးထဲက ဆိုင်တွေလည်း အကုန်ပိတ်ထားရတယ်။ လုံခြုံရေးတွေလည်း အများကြီး တွေ့ရတယ်” လို့ ပြည်သူတယောက်က ပြောပါတယ်။
အလားတူ ဗိုလ်ချုပ်အောင်ဆန်း ပြတိုက်နေရာ ဝန်းကျင်ရှိ လမ်းထိပ်တွေမှာလည်း လုံခြုံရေးတပ်ဖွဲ့ဝင် အများအပြားကို တွေ့ရတယ်လို့ ဆိုပါတယ်။
ဒါအပြင် ရန်ကုန်မြို့ အဝင်အထွက်ကိုလည်း လုံခြုံရေးတွေ တင်းကျပ်ထားပြီး ကင်းပုန်းချ စောင့်ကြည့်နေတာတွေလည်း ရှိနေတယ်လို့ မြေပြင်အခြေအနေကို သိရှိသူတယောက်က ပြောပါတယ်။
၂၀၂၅ ခုနှစ်၊ (၇၈) နှစ်မြောက် အာဇာနည်နေ့ အခမ်းအနားကို မနက်ဖြန် ဇူလိုင် ၁၉ ရက်၊ မနက် ၈ နာရီမှာ ရန်ကုန်မြို့၊ ဗဟန်းမြို့နယ်ရှိ အာဇာနည်ဗိမာန်မှာ ကျင်းပသွားမှာ ဖြစ်တယ်လို့ နစက က နိုင်ငံပိုင် သတင်းစာတွေကတဆင့် အသိပေး ထုတ်ပြန်ထားပါတယ်။
ဒါအပြင် အဆိုပါ အခမ်းအနား ကျင်းပပုံတွေကို မနက်ဖြန် မနက် ၇ နာရီ၊ မိနစ် ၄၀ မှ စတင်ကာ နိုင်ငံပိုင် ရုပ်သံတွေနဲ့ ရေဒီယိုတွေကနေ တိုက်ရိုက် ထုတ်လွှင့်သွားမှာ ဖြစ်တယ်လို့ သိရပါတယ်။
ဒါအပြင် အာဇာနည်နေ့၌ ဝမ်းနည်းခြင်း အထိမ်းအမှတ်အနေနဲ့ နိုင်ငံတော်အလံကို နိုင်ငံတဝန်းလုံး တိုင်ဝက်လွှင့်ထူရေးကိုလည်း အသိပေး နိုးဆော်ထားပါတယ်။
အာဇာနည် ခေါင်းဆောင်ကြီးတွေ ကျဆုံးခဲ့တဲ့ မနက် ၁၀ နာရီ ၃၇ မိနစ်မှာ မြန်မာ့အသံနှင့် ရုပ်မြင်သံကြားက ဥဩဆွဲ အချက်ပေးရေးနဲ့ အဆိုပါအချိန်မှာ သွားလာနေတဲ့ မော်တော်ယာဉ်တွေကိုလည်း ခေတ္တရပ်ပြီး ဟွန်းတီးစေရေးတို့အတွက် လက်အောက်ဌာန၊ ရုံးအဆင့်ဆင့်ကို ဆက်လက်အသိပေး ညွှန်ကြားထားဖို့ နစက က အသိပေး ထုတ်ပြန်ထားပါတယ်။
ဒါအပြင် အဆိုပါ အာဇာနည်နေ့ အခမ်းအနား ကျင်းပနိုင်ရေးအတွက် လမ်းပိတ်လမ်းလွှဲကိုလည်း ပြုလုပ်သွားမှာ ဖြစ်တယ်လို့ ရန်ကုန်တိုင်းဒေသကြီး အစိုးရအဖွဲ့မှ ထုတ်ပြန်ထားပါတယ်။
ဗဟန်းမြို့နယ်၊ အာဇာနည်းကုန်းမှာ ကျင်းပပြုလုပ်မှာ ကျင်းပပြုလုပ်မယ့် အခမ်းအနားအတွက် အနောက်ရွှေဂုံတိုင်လမ်းကို ရေတာရှည်လမ်းမှလည်းကောင်း၊ အာဇာနည်လမ်းကို အနောက်ရွှေဂုံတိုင်လမ်းမှ ဦးထောင်ဘိုလမ်းအထိလည်းကောင်း၊ ဦးဝိစာရအဝိုင်းကို ဦးဝိစာရလမ်းမှ ဓမ္မစေတီ လမ်းဆုံအထိလည်းကောင်း မနက် ၄ နာရီမှ အခမ်းအနားပြီးဆုံးချိန်အထိ ပိတ်ထားမှာဖြစ်တယ်လို့ သိရပါတယ်။
ဒါအပြင် ဗိုလ်ချုပ်အောင်ဆန်းနေအိမ်ပြတိုက်အတွက် စတင်ဖွင့်လှစ်မယ့် မနက် ၅ နာရီမှ ညနေ ၆ နာရီအထိ နတ်မောက်လမ်းကို ဝင်္ဂဘာလမ်းမှ ဖိုးစိန်လမ်းအထိလည်းကောင်း၊ ဗိုလ်ချုပ်ပြတိုက်လမ်းကို ငါးထပ်ကြီးဘုရားလမ်းဆုံမှ စောမဟာလမ်းဆုံအထိလည်းကောင်း၊ ဗိုလ်ချုပ်ပြတိုက်လမ်းကို ဗိုလ်ချိုလမ်းဆုံမှလည်းကောင်း ခေတ္တ ပိတ်ထားမှာ ဖြစ်တယ်လို့ သိရပါတယ်။
အလံတင်အခမ်းအနား ကျင်းပမယ့် ဝန်ကြီးများရုံး (အတွင်းဝန်ရုံး) မှာလည်း မနက် ၅ နာရီမှ ညနေ ၆ နာရီအထိ သိမ်ဖြူလမ်းကို ဗိုလ်ချုပ်လမ်းဆုံမှ သိမ်ဖြူလမ်းဆုံအထိလည်းကောင်း၊ အနော်ရထာလမ်းကို ဗိုလ်မြတ်ထွန်းလမ်းဆုံအထိလည်းကောင်း၊ မဟာဗန္ဓုလလမ်းကို ပန်းဆိုးတန်းလမ်းဆုံမှလည်းကောင်း၊ ဗိုလ်အောင်ကျော်လမ်းကို ကုန်သည်လမ်းဆုံမှလည်းကောင်း လမ်းပိတ်လမ်းလွှဲပြုလုပ်ထားမှာ ဖြစ်တယ်လို့ သိရပါတယ်။
ဒါကြောင့် လမ်းပိတ်လမ်းလွှဲ ပြုလုပ်ထားချိန် မနက် ၄ နာရီမှ ညနေ ၆ နာရီအထိ တခြား သင့်လျော်ရာ လမ်းတွေကနေ သွားလာနိုင်တယ်လို့ ရန်ကုန်တိုင်းအစိုးရအဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။
Photo – CJ
